“Temiryulkargo” kompaniyasining Xitoyda vakolatxonasi ochildi

“O‘zbekiston temir yo‘llari” aksiyadorlik jamiyatining yuk operatori hisoblangan “Temiryulkargo” kompaniyasi Xitoyning Pekin shahrida o‘zining birinchi vakolatxonasini ochdi. Mazkur voqea O‘zbekiston temir yo‘l kompaniyasining xalqaro ishtirokini kengaytirishda muhim qadam bo‘lib, multimodal transportni rivojlantirish uchun yangi imkoniyatlar yaratmoqda.

· Vakolatxonaning ochilishi “O‘zbekiston temir yo‘llari” aksiyadorlik jamiyati boshqaruvi raisining birinchi o‘rinbosari Hikmatulla Rahmetovning 14-15 dekabr kunlari Xitoyga tashrifi doirasida bo‘lib o‘tdi.

· Tashrif davomida China Railway Urumchi Bureau Group va Lyanyungan porti rahbariyati bilan muzokaralar olib borildi, hamkorlik istiqbollari va multimodal tashishni tashkil etish masalalari muhokama qilindi.

· Asosiy e’tibor O‘zbekiston va Xitoy o‘rtasida yuk aylanmasini oshirish, shuningdek, konteyner blokli poyezdlarni shakllantirishga qaratildi.

· Logistika ta’minotini yaxshilash va yuk tashishni tezlashtirish maqsadida Xitoy chegara punktlarida vagon va konteynerlarning kechikishi va to‘xtab qolishi muammolari ham muhokama qilindi.

· Tomonlar o‘z hududlarida konteyner poyezdlari va vagonlarining ishlashini optimallashtirish bo‘yicha muntazam uchrashuvlar o‘tkazishga kelishib oldilar.

“Temiryulkargo” kompaniyasi yuklarni tashish va yuk vagonlari va konteynerlar uchun infratuzilmani rivojlantirish xizmatlarini taqdim etadi, shuningdek, “eshikdan eshikka” multimodal tashishni tashkil etadi. Ushbu kompaniyaning tashkil etilishi 2023-yilda prezident tashabbusi bilan boshlangan temir yo‘l islohotining bir qismi bo‘ldi.